他想與你結婚的5大蛛絲馬跡

情人節向來係熱門嘅求婚日。可能你最近夢見佢同你求婚，又或正在期待佢將求婚鑽戒藏在玫瑰花送你浪漫驚喜……幻想總是美麗的，現實中佢究竟玩夠未？係咪準備好同你結婚過人世？不妨檢視吓你嘅情人是否有以下行為，或多或少都反映到佢已有準備安頓落嚟。

1. 他想你將私物留喺佢屋企

男人願意讓女人嘅私物擺放喺佢屋企，唔代表佢為人大方或屋企夠大，而係意味佢已經預備好有你同佢一齊生活。屋企係男人嚴防嘅私人空間，若然佢冇打算同你長長久久，恐怕細小如一把梳一支牙刷都話冇位放。如果佢特別為你騰空一個抽屜，又或買定日常用品方便你使用，表示佢很歡迎你進入他的私生活，期待與你一起創造二人世界。

2. 他比以前更發奮

雖然呢個年頭提倡男女平等，但大多數男人依然會視賺錢照顧女人為責任。婚姻顧問指，經濟基礎係男人決定結婚與否嘅最大考慮。如果你嘅情人比以前更加博紮，積極搵份更高薪嘅工作，犧牲睇波打機嘅時間去做賺錢，意味佢準備建立更穩定嘅將來，以便照顧你，甚至是你們的B仔B女。

3. 他打算買樓

有結婚生仔打算嘅男人一般都想過買樓，而消費習慣亦較以前謹慎，減少花費於吃喝玩樂或追買潮流玩物，並轉移視線到房地產、股票等有回報嘅項目。若佢邀請你一同研究樓盤、計畫將來嘅安樂窩，那表示你已經出現喺佢將來嘅畫面裡。不過，如果佢講到明供樓比租樓平，邀請你同居攤分租金，那就另作別論，有必要時或需跳船。

4. 他無論做甚麼也想你陪伴

貪玩嘅男人，一般都享受跟豬朋狗友來個Men-only聚會，打機、睇波、賭啤牌……玩幾癲都冇皇管。相反的，定性嘅男人雖然都喜歡呢啲聚會，但頻率遠較前者少，寧願花更多時間同你一齊，甚至想你陪佢出席男人聚會，唔介意佢班friend點睇佢（你），亦唔擔心佢嘅真性情畀你睇穿晒，因為佢作決定時以「我」變為「我們」作出發點。

5. 他跟你談及將來

情場高手知道女人喜歡聽浪漫嘅「空談」，於是會將夢幻婚禮、理想婚姻生活等「計畫」掛在口邊。然後，真正想同你共諧連理嘅男人，未必會大造浪漫，而是會實際地計畫將來做啲乜，譬如等夏天教你學游水、待聖誕帶你去滑雪……只要細心留意，就不難發現其實佢心裡有沒有你。